Biekerech: Viru kuurzem a bei bäschtem Wieder gouf de neie Skatepark zu Biekerech an a Präsenz vum Sportminister Georges Mischo offiziell ageweit. E Projet, op dee vill Kanner a Jugendlecher aus der Gemeng an driwwer eraus mat Spannung gewaart hunn.

D’Skaten huet zu Biekerech eng laang Traditioun. Scho virun 2003, ier d’Biekerecher Sportshal gebaut war, gouf et hei eng éischt hëlze Ramp. 2013 ass dunn nieft der Sportshal eng richteg Skatepist mat Betonselementer entstanen. Wéi d’Bauaarbechten um Biekerecher Schoulcampus 2022 ugefaangen hunn, huet d’Pist missen op eng nei Plaz, hannert d’Sportshal kommen.

Besonnesch Wäert gouf drop geluecht fir déi al Elementer vum Skatepark z’erhalen, ganz am Sënn vun der Zirkularwirtschaft. Fir d’Pist awer méi attraktiv ze gestalten, gouf se mat neien Elementer ergänzt. D’Planung an d’Konzeptioun goufen a Kooperatioun mat der Lëtzebuerger Skatefederatioun, der LSF, entwéckelt, fir e Parcours ze schafen, deen och fir Ufänger gutt zougänglech ass.

D’Investitioun fir de Skatepark louch bei iwwer 323.000 €, wouvun de Sportsministère 35 % matfinanzéiert.

D’Aweiung vum Skatepark war e grousse Succès, net nëmmen duerch déi gutt Wiederkonditiounen, mee och dank der Organisatioun vun der Jugend- a Sportskommissioun. Mat Foodtrucks, Skate- a Graffiti-Workshops war fir Jonk an Al genuch Animatioun gebueden. Gläich no der Aweihung war schon Hochbetriib op der neier Skate-Pist, wou d’Kanner an och schon di mi Grouss hirt Können bëschtens ënner Beweis konnte stellen. (CR) (Fotoen: Charles Reiser)