E Sonndeg, den 3. Mäerz waren d’Eechternoacher Quaichleken, dat sinn d’Scouten a Guiden aus der Abteistad, op Invitatioun vun der Amicale Op Lamp fir en Optrëtt am Fleegeheem Waasserbëlleg.

Mat engem faarwege Programm ënnert dem Motto „E ganz normale Schaffdag“ hu sie d’Bewunner a Bewunnerinne vum Fleegeheem gutt ënnerhalen. Och d’Familljemembere ware begeeschtert.

Ënnert anerem stounge Lidder wéi „Il est 5 heures, Paris s’éveille“, „Wann se mures fësche ginn“, „Babette vom Jumbo Jet“, „Das bischen Haushalt“, „Money, Money, Money“, „Hey Boss, ich brauch mehr Geld“, „L’accordéoniste“ oder „De groussen Hexemeeschter“ op dem Programm. All dëst Lidder hunn déi jonk an och déi e wéineg manner jonk Akteure mat vill Fantasie a mat ganz originelle Kostümer duergestallt.

Wéi bei ganz villen Optrëtter vun de Quaichleken huet dat al‘t Fueslidd am Iechternacher Dialekt, “Hämelmaous-Léid“, den Ofschloss vum Programm gemaach. D’“Hämelmaous-Léid“ handelt iwwregens net, wéi ee géif unhuelen, vun enger Maus, mee vun engem Insekt aus der Famill vun de Grillen.

Bei dëser Geleeënheet ass déi ganz Equipe vun de Quaichleken nach eng Kéier op d’Bün gaange fir de Nolauschterer, déi e groussen Applaus ginn hunn, merci ze soen.