Fanfares des Faubourgs
mat Schülerauditioun

Kierzlech war um Kiem an der Sportshal den traditionelle Wanterconcert mat Schülerauditioun vun der Fanfares des Faubourgs an dat ënnert der Direktioun vun hirem neie Chef, Charel Krysatis. Vill Hoffnunge leien a sengen Hänn fir d’Zukunft vun der Musek an och fir esou vill ewéi méiglech d‘Schüler an der Musek ze integréieren. Dëse Concert zesumme mat der Musek an hire Schüler soll dat ënnersträichen. Als Optakt vun der FOFA war e klenge Marsch ugesot „Marcia Piccola“ vum Adone Sabatini, duerno e weidere flotte Marsch „Nurse“ Lorenzo Pusceddu; dunn en Draach aus der Vikingerzäit „“How to train your dragon” John Powell; uschléissend Südamerikanesch Rhythmen „Aztec Fire“ Jay Bocook; aus dem Film „American Gigolo“ den Haaptsong „Call me” Giorgio Moroder; e bësse méi Klassesch „Pictures at an exhibition“ Modest Mussorgsky; Wackele mat engem Spuenesche Lidd “Sway”; et geet och am stoen “I’m still standing” Elton John; als Ofschloss vum éischten Deel nach der Däiwel “You’re the devil in disguise”. Presentatioun vum Programm louch an den Hänn vum Claude Hornick. Et war dunn un der Schülerauditioun, Iwwergang bei de Cosimo Colaci, responsabel vun de Quartiersmusekschoulen vum Stater Conservatoire. Hien huet d‘Wichtegkeet vun de Quartiers Musekschoule fir déi lokal Museken ënnerstrach an duerch de Programm vun deene verschiddenen Auditiounen, Solfège an Instrumenter, mat Detailer geleet. Héichpunkt war d’musizéiere vu verschiddene Schüler an der Musek selwer. Fir den Ufank eppes méi Liichtes fir lues a Stëmmung ze komme mat enger Musikalescher Kamell. „Jellybeans“ Gary Gazlay an als Ofschloss eng Rondrees op Jamaika; Madagaskar a Kreta. „ Islands of the World” Dean Jones. De Publikum war Begeeschtert an huet dat mat euphoreschem Applaus honoréiert. De President vun der Clausener Musek , André Heinen, huet alle bedeelegten e grousse Merci ausgesprach an op e Patt invitéiert. D‘Publikum huet ugefaange rhythmesch ze Klappen a wollt d’Musek mat de Schüler nach eng kéier héieren. „Queen on stage“ war hei déi richteg Musikalesch Äntwert a mat „We are the champions”goung dëse flotte Wanterconcert op en Enn. Weider Infoen op fofa.lu