Nodeems Corona 2020 an 2021 vill Méint de Chouergesang verhënnert hat, huet de Kierchechouer vu Beetebuerg am September 2021 den normale Pensum vun all Woch nees opgeholl: all Sonndeg eng Houmass, eng Prouf an oft nach eng Begriefnismass....
An der Generalversammlung am Ufank vum Mount huet d’Presidentin Melanie Juncker de Sängerinnen a Sänger dofir Merci gesot fir de groussen Asaz am Déngscht vun der chrëschtlecher Gemeinschaft vu Beetebuerg. Am Moment besteet de Chouer aus 14 Dammen a 5 Hären a prouft a sengt ënner der Direktioun vum Myriam Schartz.
Fir 30 Joer aktive Kierchegesank huet d’Martine Freis vum Diakon René Schumacher déi gëlle Medaille vum Piusverband iwwerreecht kritt.