En halleft Joerhonnert Asaz fir Chancëgläichheet a sozialen Zesummenhalt: Dat hu kierzlech d’Femmes Libérales Mamer/Suessem am Restaurant L’Ultimo zu Mamer kënne feieren. D’Generalversammlung war d’Geleeënheet fir d’Presidentin Sylvie Klopp, déi vill Gäscht, dorënner och de Max Hahn, Minister fir Famill, Solidaritéit, Zesummeliewen an Accueil an d’Deputéiert an Nationalpresidentin vun de Femmes Libérales Simone Beissel, mat op eng Zäitrees ze huelen.

En halleft Joerhonnert Engagement fir eng oppen an tolerant Gesellschaft

Lass goung et den 28. Mee 1975, wou eng Grupp héich motivéierter Fraen a Männer d’Fëllement vun der Vereenegung geluecht hunn.

Zu de Moteuren hunn ënner anerem déi 1. Presidentin Tessy Losch, d’Nicole Gaasch, awer och de spéidere Mamer Buergermeeschter René Federspiel gehéiert. Zesumme kämpfe fir eng oppen an tolerant Gesellschaft, de Leit bäistoen, déi Hëllef brauchen a Mënschen zesumme brénge fir en harmonescht Zesummeliewen ze fërderen: Dat sinn déi iewescht Ziler vun de Femmes Libérales, déi si duerch Diskussiounsronnen, Konferenze, Ausflich, Trëppeltier,  awer och Bazaren a vill aner Aktioune versicht hunn ze erreechen.

Do si fir Leit an Nout

Iwwer déi lescht Joerzéngte konnten esou iwwer 40.000 Euro u Spende gesammelt ginn, déi deene Schwächsten an eiser Gesellschaft a besonnesch Fraen an Nout zoukomm sinn. Bei der 50 Joer-Feier vun de Femmes Libérales Mamer/Suessem konnt d’Associatioun e Scheck vun 2000 Euro un SOS Détresse iwwerreechen, d’Organisatioun déi ronderëm d’Auer eng diskreet Hëllef an alle Liewenslagen ubitt.

Ofléisung un der Spëtzt

Dës Scheckiwwerreechung war dann och déi lescht Amtshandlung vun der laangjäreger Presidentin Sylvie Klopp. No bal engem Véierelsjoerhonnert (2001-2025), dat och vun der Fusioun am Joer 2010 vun de Sektioune Mamer a Suessem vun de Femmes Libérales geprägt war, huet si d’Flam vun de Femmes Libérales Mamer/Suessem un d’Marie Kirch weiderginn. Si huet d’Ausdauer an den Engagement vum Sylvie Klopp an dem Marianne Geimer, déi no laange Joren als Sekretärin vun de Femmes Libérales Mamer/Suessem hiert Amt ofginn huet, gewierdegt a gehofft, och weiderhin op d’Hëllef vun deenen zwou Dammen zielen ze kënnen.

D’Rechter vun de Frae weider stäerken

Fir déi nei Presidentin ass  et wichteg, d’Frae weider ze stäerken an ze vernetzen. Si setzt dobäi op den oppenen Dialog tëschent de Membere vun der Vereenegung, en Dialog, aus deem sech konstruktiv Impulser fir d’Politik op lokalem an nationalem Plang erginn. “D’Rechter vu Fraen si säit der Grënnung vun eiser Vereenegung däitlech verbessert ginn. Eis Virgängerinnen hunn haart gekämpft a vill erreecht. Haut geet et drëm, dës Rechter net nëmmen ze erhalen, mee och weiderzedenken”, huet d’Marie Kirch ënnerstrach.