Ufank Dezember, bannen an der gudder Stuff ginn d’Kanner ginn ëmmer méi wibbeleg. An d’Elteren ? Absolut « tiefenentspannt ». Op emol ass et esou wäit: et schellt. Endlech! Den Nowuess spréngt op, leeft … opmaachen. Yesss!!! Virun der Dier stinn se, zwee sympathesch Gesiichter - allebéid beschtens bekannt. Si si vum „Gaart an Heem Uewerkäerjeng“ a selbstverständlech pünktlech, ewéi ofgemaach. Gutt gelaunt kommen elo och déi Grouss nogeschlappt. Ewéi an de Joren virun, hate si hir Nordmann onkomplizéiert a bequeem bei dësem dynamesche Lokalveräin bestallt – natierlech mat deem praktesche Liwwerservice. E prächtege Chrëschtbeemchen a keng Nolen am Auto, …, ass dat net herrlech?

Änlech Zeenen spillen sech dëser Deeg an der Gemeng Käerjeng - an a villen Nopeschuertschaften - zegfach of. Mol kritt een säin Beemchen opgeriicht, mol gëtt de Gaart an Heem – sief et fir e Kaffi, eng Drëpp oder einfach nëmmen ze „schnëssen“ - bis an d‘Wunnéng eragebieden. Esou vill Gentillesse weess een ze schätzen. Mat Glühwäin an engem Ierbsebulli gëtt sech an der Mëttesstonn dann zesummen am Veräin gestäerkt. Allebéid sinn hausgemaach a wierklech lecker.

Comitésmemberen vum « Gaart an Heem Uewerkäerjeng » sinn aktuell Sascha Seresse (President), Marie-Jeanne Schambourg (Vizepresidentin), Christophe Kieffer (Sekretär), Romy Kieffer-Thill (Trésorière), Hary DeJong, Laurence Koster, Jang Nilles a Luc Bauer. Wien Interesse huet fir matzemaachen ass häerzlech wëllkomm. Renseignementer gëtt et beim Sekretär, ze erreechen ënner „ c.kieffer@aikq.de “ an „ 661 / 271 070 “.

Bref, richteg vill Opwand fir de Veräin, äusserst positiv Commentairen allerdéngs sinn ëmmer nees e Garant fir des Traditioun och weiderhin oprecht ze halen. Den Erléis vun dëser Aktioun fléisst integral an déi nei Veräinstenue.

De Veräin wënscht allen eng schéin Adventszäit.

This post is part of mywort mission:

Adventszeit