Video: Mumm Séiss -en Operetten-Highlight op Lëtzebuergesch
136
„Dem Dicks seng schéinst Operett ,Mumm Séis‘ ass hei zu Lëtzebuerg szenesch fir d’lescht 1991 um Wolzer Festival opgeféiert ginn. Mir vun der ,Opéra du Trottoir‘ duechten, et wär nees sou lues un der Zäit, fir dat wonnerschéint Wierk nees op d’Brieder ze bréngen.“ Esou schreiwen d’Yannchen Hoffmann an de Carlo Hartmann an der Invitatioun fir d’Première vun dëser Opféierung, e Samschdeg, de 25. September am Atelier zu Hollerech.
Looss mer fir d’éischt e bëssen zréckbliederen … „Eisen Dicks“ (Edmond de la Fontaine, 1823-1891), kennt wuel all Kand. Dëse „Kapphär vun eiser Sprooch“ ass tëscht dem 14. Oktober 2009 an dem 28. Mäerz 2010 ganz besonnesch gewierdegt ginn an där formidabeler Ausstellung „Ech sinn e groussen Hexemeeschter“ zu Miersch am nationale Literaturzenter a bei de Manifestatiounen, déi mat dëser Ausstellung verbonne waren, zum Beispill beim Theaterstéck „Schold a Schäin“ vum Claude Mangen, fir nëmmen dat ze ernimmen.
„Ech sinn e groussen Hexemeeschter“ – domat wäre mer och scho bei der „Mumm Séis“. Zu „Munneref am Bad“ hat den Dicks am Laf vum Joer 1855 dëst „Kaméidisstéck mat Musek a Gesank“ geschriwwen a komponéiert. D’Gym huet „D’Mumm Séis oder De Geescht“ den 11. November 1855 an der Stad am Cercle fir d’éischt opgefouert an et gouf e groussen Erfolleg. D’Operett ass 1856 publizéiert ginn.
„Et wor emol e Kanonéier …“
D’Haaptroll spillt, wéi kënnt et anescht sinn, d’Mumm Séis, eng Wäschfra vu Clausen (oder soll ee besser soen „aus“ Clausen), déi aus verschiddene Grënn hir Verlobung mam éisterräichesche Kanonéier Gottlieb Hurra geléist huet. An deen huet sech dofir um Bock erschoss … Awer dem Hurra säi Geescht léisst där ängschtlecher Mumm Séis keng Rou – mengt se wéinstens, well do sinn och nach zwéi komesch Noperen … Den Hexentommes, deen de Geescht mat senger Hexerei verdreiwe wëllt, huet et nëmme just op der Mumm Séis hiert Verméigen ofgesinn an de Sproochmates, dee mat senge schéinste Spréchwierder opwaart, wëllt sech partout mat hirer Niess, dem Kättéi, bestueden. Mä d’Kättéi ass frou mam Péiter. Hatt kritt herno och säi Péiter. An et gëtt een och gewuer, ob den Hurra da wierklech nuets an der Mumm Séis hirem Haus ronderëm geeschtert…
Schmasseg Lidder – „Et wor emol e Kanonéier“, „Ech sinn e groussen Hexemeeschter“, „Du brauchs mer näischt ze schwieren“ – rappen d’Publikum mat an deem Stéck, wat am Laf vun de Jorzéngten ëmmer nees an deene verschiddensten Uertschaften vum Ländchen an esouguer doriwwer eraus opgefouert ginn ass a gutt ukoum, wuel well et en Operetten-Highlight op Lëtzebuergesch ass. (Looss mer op dëser Plaz drop hiweisen, datt et d'„Mumm Séis“ och an enger däitschsproocheger Versioun gëtt, nämlech „Mutter Suse“. Keen aner wéi den Alain Atten huet déi zwee Stécker 1994 am Buch „Mumm Séis/Mutter Suse“ virgestallt an ausgezeechent kommentéiert. Et géif ze wäit féieren, fir hei eppes méi genee drop anzegoen; et sollt just gesot sinn.)
Och bei där neier Opféierung am „Atelier“ zu Hollerich wäert d'„Mumm Séis“ ganz sécher gutt ukommen. Et däerf ee gespaant sinn, wéi d’Yannchen Hoffmann an de Carlo Hartmann, déi allen zwee un der Wiener Volksoper optrieden, d’Wäschfra vu Clausen an den Hexentommes interpretéieren. An et däerf ee grad esou gespaant sinn, wat d’Annette Schlechter aus dem Sproochmates mécht. Och, wéi d’Mady Weber an den Al Ginter sech als Kättéi, respektiv als Péiter erauszéien, gëtt ee spéitstens e Samschdeg, de 25. September oder e Sonndeg, de 26. September gewuer.
Opféierunge vun der Dicks-Operette „Mumm Séis“ mat der „Opéra du Trottoir“: Atelier (25, 26.9.); CAPe Ettelbréck (6.10.); Housen (8.10.); Berdorf (24.10.), Mäerzeg (20.11.); Réimech (28.11.); Lamadelaine (30.11.); Déifferdeng (1.12.); Diddeleng (4.12.); Trifolion (22.1.); Dippech (23.1); Abtei Neumünster (29., 30., 31.1., 1.2.); Leideleng (5.2.); Gilsdref (6.2.); Wormer (11.3.); Colmar-Bierg (12.3.); Steesel (23.5.)
m.h.
Looss mer fir d’éischt e bëssen zréckbliederen … „Eisen Dicks“ (Edmond de la Fontaine, 1823-1891), kennt wuel all Kand. Dëse „Kapphär vun eiser Sprooch“ ass tëscht dem 14. Oktober 2009 an dem 28. Mäerz 2010 ganz besonnesch gewierdegt ginn an där formidabeler Ausstellung „Ech sinn e groussen Hexemeeschter“ zu Miersch am nationale Literaturzenter a bei de Manifestatiounen, déi mat dëser Ausstellung verbonne waren, zum Beispill beim Theaterstéck „Schold a Schäin“ vum Claude Mangen, fir nëmmen dat ze ernimmen.
„Ech sinn e groussen Hexemeeschter“ – domat wäre mer och scho bei der „Mumm Séis“. Zu „Munneref am Bad“ hat den Dicks am Laf vum Joer 1855 dëst „Kaméidisstéck mat Musek a Gesank“ geschriwwen a komponéiert. D’Gym huet „D’Mumm Séis oder De Geescht“ den 11. November 1855 an der Stad am Cercle fir d’éischt opgefouert an et gouf e groussen Erfolleg. D’Operett ass 1856 publizéiert ginn.
„Et wor emol e Kanonéier …“
D’Haaptroll spillt, wéi kënnt et anescht sinn, d’Mumm Séis, eng Wäschfra vu Clausen (oder soll ee besser soen „aus“ Clausen), déi aus verschiddene Grënn hir Verlobung mam éisterräichesche Kanonéier Gottlieb Hurra geléist huet. An deen huet sech dofir um Bock erschoss … Awer dem Hurra säi Geescht léisst där ängschtlecher Mumm Séis keng Rou – mengt se wéinstens, well do sinn och nach zwéi komesch Noperen … Den Hexentommes, deen de Geescht mat senger Hexerei verdreiwe wëllt, huet et nëmme just op der Mumm Séis hiert Verméigen ofgesinn an de Sproochmates, dee mat senge schéinste Spréchwierder opwaart, wëllt sech partout mat hirer Niess, dem Kättéi, bestueden. Mä d’Kättéi ass frou mam Péiter. Hatt kritt herno och säi Péiter. An et gëtt een och gewuer, ob den Hurra da wierklech nuets an der Mumm Séis hirem Haus ronderëm geeschtert…
Schmasseg Lidder – „Et wor emol e Kanonéier“, „Ech sinn e groussen Hexemeeschter“, „Du brauchs mer näischt ze schwieren“ – rappen d’Publikum mat an deem Stéck, wat am Laf vun de Jorzéngten ëmmer nees an deene verschiddensten Uertschaften vum Ländchen an esouguer doriwwer eraus opgefouert ginn ass a gutt ukoum, wuel well et en Operetten-Highlight op Lëtzebuergesch ass. (Looss mer op dëser Plaz drop hiweisen, datt et d'„Mumm Séis“ och an enger däitschsproocheger Versioun gëtt, nämlech „Mutter Suse“. Keen aner wéi den Alain Atten huet déi zwee Stécker 1994 am Buch „Mumm Séis/Mutter Suse“ virgestallt an ausgezeechent kommentéiert. Et géif ze wäit féieren, fir hei eppes méi genee drop anzegoen; et sollt just gesot sinn.)
Och bei där neier Opféierung am „Atelier“ zu Hollerich wäert d'„Mumm Séis“ ganz sécher gutt ukommen. Et däerf ee gespaant sinn, wéi d’Yannchen Hoffmann an de Carlo Hartmann, déi allen zwee un der Wiener Volksoper optrieden, d’Wäschfra vu Clausen an den Hexentommes interpretéieren. An et däerf ee grad esou gespaant sinn, wat d’Annette Schlechter aus dem Sproochmates mécht. Och, wéi d’Mady Weber an den Al Ginter sech als Kättéi, respektiv als Péiter erauszéien, gëtt ee spéitstens e Samschdeg, de 25. September oder e Sonndeg, de 26. September gewuer.
Opféierunge vun der Dicks-Operette „Mumm Séis“ mat der „Opéra du Trottoir“: Atelier (25, 26.9.); CAPe Ettelbréck (6.10.); Housen (8.10.); Berdorf (24.10.), Mäerzeg (20.11.); Réimech (28.11.); Lamadelaine (30.11.); Déifferdeng (1.12.); Diddeleng (4.12.); Trifolion (22.1.); Dippech (23.1); Abtei Neumünster (29., 30., 31.1., 1.2.); Leideleng (5.2.); Gilsdref (6.2.); Wormer (11.3.); Colmar-Bierg (12.3.); Steesel (23.5.)
m.h.
Weitere Neuigkeiten von Paul Lenert >
