Den Alain Atten huet seng Bicher an der „Libo“ ënnerschriwwen

Wann et dobaussen och vill geschneit huet, haten de leschte Samschdeg vill Leit de Wee an de Bicherbuttek „Libo“ an der Stad fond, fir vum „Sproochmates“ Alain Atten eng Ënnerschrëft an säin neitste Buch ze kréien. De „Sprochmates“ mat engem „o“ kënnt aus dem Dicks senger „Mumm Séis“, well hien ëmmer a Spréch geschwat huet, de „Sproochmates“ mat zwee „o“ kënnt vun Esch/Sauer, schreift sech Alain Atten. Fir ze weisen, wat fir Weeër eis Sprooch gaang ass, huet e sech en halleft Jorhonnert laang dermat ofginn, fir Bescheed ze wëssen. Nom Radiosdictionnaire vun 1978 bis 1998 huet den Alain Atten elo net méi alphabetesch, ma systematesch ugerappt an op dräi Pläng opgeschlësselt: grammattesch, idiomatesch an ethnografesch, d. h. Wierder, Riedensaarten a Gebräicher. Och leit hannen am Buch eng CD mat allen Texter, déi en mat oder ouni d’Buch am Grapp ka lauschteren. „De Sproochmates“ gëtt et an all Bicherbuttek ze kafen. (Text/Foto: Gilbert Linster)