Wéi all Joer gëtt um Sichenhaff un déi Zäit erënnert, wou eng Leprastatioun do fonctionéiert huet.

Viru Laangem haten deemools Dammen aus der Stad all Joer op Sichenhaffer-Kiermesdag eng Hëllefsaktioun lancéiert an hu Fliedercher gebak an da verkaf. Den Erléis koum deene Kranke vum Sichenhaff zegutt.

An de 70-er Joren hat den Interesseveräin Pafendall-Sichenhaff dës Traditioun erëm opliewe gelooss a säithier gëtt all Joer, op Oktav-Ufank, an der Sichenhaffer Kapell eng kleng Feier ofgehalen, wou Veräiner aus dem Quartier Pafendall-Sichenhaff dru bedeelegt sinn a Fliedercher verschenke. Leit déi wëllen, kënnen e klenge Geste maachen, deen da fir e gudden Zweck benotzt gëtt. Den Cäecilieveräin vum Dällche gëtt speziell nees fir déi Geleeënheet reaktivéiert a begleet d’Feier.

De Rendezvous ass e Samschdeg, den 10 Mee 2025 um 17 Auer bei der Sichenhaffer Kapell.